بعد الزعل لحظة رضـاك

ياحي جيت ازعلك لحظه واراضيك
..........الله يابعـد الزعـل لحظة رضـاك

***
اشعلك واطفي واهج(ن)يشتعل فيك
..........اطفي الزعل بك واشعل الشوق جـوّاك

***
واذا انتثر دمع العتب فوق خديك
..........وانساب لين يحل ضيف(ن)على شفاك

***
والأبتسامه خالطت دمع عينيـك
..........ياكن دمع العين جاك ايـ (ترجّـاك)

***
غالي منك وقّف على غالي(ن)فيك
..........وصار العطاء مدري منك او هو اعطاك

***
وفي صمت كفك عانقت كف غاليك
.......... وكن الخلايا تعتذر من خلايــاك

***
الملمك واجمع شتاتك واخليـك
.......... تنسى الخطاء منّي وانا انسى خطاياك

***
تقرب وانا اقرب تحتويني وانا احويك
.......... لين انت تسكني وانا اسكن ثناياك

***
يمناي من تحتك والأخرى تغطيـك
..........وانا بعد تحت ايمنك فوق يسراك

***
في همس تحكي لي وفي همس احاكيك
..........تسأل واجاوب وأسألك واتحـراك

***
وتقول انا مبكي منك لكن ابكيـك
.......... اخاف من صدّك وهجرك وفرقـاك

***
واقول لك معقوله اقفي واخليـك
..........وانساك لاواللي من الطين سـوّاك

***
تشهق وتضحك لي وتقرب وانا اجيك
..........حتى ضلوعي تلتحم مع حـناياك

***
ومابين يدّيني وانا بين اياديـك
.......... نرقى سوى نعبر مدارات وافـلاك

***
ونرحل بحاضرنا لماضي لياليك
..........ونبقى معـاً ماغير انا بس وايّـاك

***
وتقول لي ياحي ازعل وابرضيـك
.......... الله يابعد الزعل لحظة رضـاك