في هالزمان الطيب أعلن وفاته الطِيب مات وكل طيّب يعزيه

يا جاهل ٍمر الزمان وحلاته
خذ هاك عقلي ما نفعني ولا بيه
 
في هالزمان الطيب أعلن وفاته
الطِيب مات وكل طيّب يعزيه
 
يرحمك يا عود ٍحفظ لك وصاته
يبيك تتبع ساقته ما تخليه
 
علمك سيئات الزمن وإحسناته
يامرك بالمعروف ليتك تماشيه
 
الله وهبنا دين وأحسن صفاته
وأنزل لنا التشريع واجزل معانيه
 
الحق والباطل عرفنا جهاته
وما يزرع المخلوق له يوم يجنيه
 
أحد ٍله الدنيا على الكيف جاته
الله عطاه وكل شيٍ بأياديه
 
ما ذاق لوعات الزمان وشقاته
الفقر والتجويع يسمع بطاريه
 
وأحد ٍيدور في زمانه نجاته
يبي الستر والعافيه بين أهاليه
 
عزيز نفس ولا يبدّل عباته
راضي ويدري عيشته ما تكفّيه
 
وأحد ٍأبد ماخذ طبايع خواته
ضعيف رآي وكلمته ما تقديه
 
وأحد ٍلبس ثوب المراجل بذاته
وا سِعد عين اللي من الضيق ناصيه
 
وأحد ٍصميدع يرهبك بإلتفاته
حرٍ مطالعيه عن الناس تغنيه
 
وأحد ٍيضيع صيدته من عماته
لا واخساره من ترجّى يعشيه
 
وأحد ٍزرع ما نال غير الحتاته
الحظ كنه واقف ٍله معاديه
 
وأحد ٍقطف ورد الزمن وإثمراته
 
 
 
 
باب البخت مفتوح دايم يناديه
 
وأحد ٍتساوى في حياته مماته
وأحد ٍيموت وطيّب الذكر يحييه
 
الوقت لو يومي عليك بعصاته
ما هي غريبه منه هذي مماشيه
 
يا بوي هات اللي يجي منك هاته
راضين باللي ما تكنه وتخفيه
 
 
 
ممارآق لي "

تسلم  ايدك  ونتمنى المزيد  من الابداعات

يا بوي هات اللي يجي منك هاته.راضين باللي ما تكنه وتخفيه

تسلم ايدك