غرام جنون

أحبّك حبّ ما يوصف يِسَمّونه غَرَام اِجْنون
غدَا بِيْن الضّلوع العوج مِتْمَرْكِزْ لَهَا سُلْطَان
مَسَافاتي مَعِك تِحْلَى وكنّي أمِر ٍللكون
وفى قٌرْبك أنا أنسى حياة اليأس والاحزان
أشوف اِعْيونك اِتْعجّب وكنّ السّحْر بي مسكون
أجل والله بقلبي اِسْمك وحبّك مالهم أوزان
معاك الحزن يتغرّب وهمّ الهمّ فيني اِيْهون
وقلبي ينفَجِر فرحه ليا شافك وشال اِلحان
حبيبي الحُسْن أوصافك ومثلك ما وجد مزيون
جمالك زاد عن حدّه ولك تترصّد الأعيان
على اِفراقك أنا مَقْوى ولا لي ف البعاد اِحْصون
أبيك وْ يشهد الله ما أبي غيرك ولا أنسان
غرامك كلّ يوم أكبر غرام ٍ ما هقيت اِيْكون
بهذا الكبر لي كبره يفوق الكون والاكوان
كأِنّ الحبّ لك موجود مخصوص ٍ ودوم اِيْصون
غلاتك ف الحَشَا حاشا تهون اِبْيوم لو ماكان
ويبقى ذكرك اِفْبالي وتِِفْكيري مَعِك مَسْجون
ويمِّك هَامَتِي أعْلا وقلبي عانق الازمان
تَعَالي قرّبِي ياللي سَكَنْتي كلّ حِسْ وِشْجون
وِصَار الحُبّ لك وحدك مِعَمّد شامخ الأركان
واِحبّك حبّ ما مثله يِسَمّونه غَرَام اِجْنون
غدَا بِيْن الضّلوع العوج مِتْمَرْكِزْ لها سلطان