انشدك عن بنتن خذت روح من روح = اللي خذت ماتت والاخرى اتركتها
لا ناظرت لك تغمز العين وتروح = ولاغمزت بالعين روحك خذتها
( كاميرا التصوير )
يفشي سرك لو وشوشته = متعود مايكتم سر
وينادي يامن يسمعني = يكشف سرك ما يصبر
ويعلمك اشقال الثاني = وانت لفعله ماتنكر
( التليفون )
أنشدك عن من لايثني كلمته = يفعل ولاتثنيه كل الأمنيات
مايوم شفته بس تسمع سيرته = ولا ايتأخر موعده لو ثانيات
ماله معزه بس واجب ضيفته = لامن حضر ياخذ ولايلبس عبات
( الموت )
مايزداد إلا في نقصه = مايوقف عن زود النقص
نايم او صاحي ماهمه = ماهو في أمرك مختص
ودك يوقف لكن ماشي= وان وقّف دورك خلّص
( العمر )
انشدك عن من موضعه مايداسي = وله لفةٍ موزونةٍ تشبـه القـوس
دايـم تـرى له مطلعـن بالمقاسـي = يغيب فامريكا ويطلع على الروس
( العقال )
وأهيف مذبوح على صدر غيره = يترجم عن ذي منطق وهو أبكم
تراه قصيرا كلما طال عمره = و يضحى بليغا وهو لا يتكلم
( القلم )
مطية فارسها راجل = تحمله وهو لها حامل
واقفه بالباب مزيوله = لا تشرب الدهر ولا تاكل
(النعال الله يكرمكم )
أنشدك عن رجلٍ ذبحناه بالسيف = من غير سابق ذنب خانه خويه
ثمّ اختفى الرجّال يومين ماشيف = واليوم ثالث يوم يطلـع عليـه
مانفع بالرجّال ذبحٍ وتخويـف = قام يتحدى النـاس ميـه بميـه
( شعر الراس او شعر اللحيه والسيف اللي هو الموس )
انشدك عن بنت ترصك على الكبد = وتشبك يديها من وراك وتضمك
وعيالها ثلاثة عيال بالعد = الكل منهم في لزومه يهمك
توعد بها ميعاد في كل موعد = وينبض بها قلبك ودورات دمك
( الساعه )
أبنــشدك عن بنـــت فـوق الــثمانين = يشوفها العـــاشق في غاية صباها
خواتها عــند البـــشر بالمـــلايين = ولو عمـرهــا عـشرين محدن بغاهـا
وقت الزفــاف يرافق البنت بنتيــن = قدامــها وحده و وحده وراهــا
( السياره )
انشــدك عن بنت تبين نوايـــاك = و ليا طرت لك نيتن بينـتـــها
يعرفك فيـها من نطحك وتقفـاك= خصوص ليامن اليدين امسكتها
و أكثر ما يمسكها من ايديك يسراك = ياما ارفعتها فوق ولا احدرتها
( اشارة السياره [ الفليشر ] )
بنتن تجيك ابكل يوم وكل يوم ابوجه غير = احيان تاتي لحالها واحيان مع طفلن صغير
ضحكاتها ويا الظروف وشكلها حيل امعروف = تكشف عن المستور للواعي ومنظرها سفير
( الجريده والملحق )
ياويش شي فيه خمسة رياجيل = لا انس ولا جان ولاهن بضاعه
اولهم اليا مات باقي بهم جيل = صاروا ثمان وكلبوهم جماعه
( عثمان)
أسألك عن حي طبيعي سكن حـي = وعقب السكن صبّح بهمن و حيـره
في موقعن مظلم ولا يدخلـه ضـي = صلى صلاة اللي نزيـهن ضميـره
في مسجدن يصفق على جنوبه المي = ما يوم صلابه من الناس غيـره
( النبي يونس في بطن الحوت )
وشهو الصديق اللي تحبه وتغليه = ومن زود حبك ودك انـه بـعـيدي
تفرح اليا صارت بعيده مـواريه = واليا قرب أكيد صدرك يضيقي
( النظر )
انشدك عن بنتن لها عدة اشكـال = تباعها يسلم من شـرور الافـات
ياما ارشدت ناس على مر الاحوال = وتنير درب مظلـم دون لمبـات
انشهد ان اللي صنعهـا للاجيـال = سوابهم معروف من عقب مامـات
( عيون القطط البيضا اللي في الشارع للسيارات )
انشدك عن بنت لها قيد وحبال = تذرف غزير الدم لحظةغرقهـا
( ورقة الشاي
تذرف اللون الاحمر لحظة غرقها في كوب الماء )
انشدك عن ورع لبنت قديمه = شايل على ظهره وريع ٍ مسيكين
البنت من دونه تراهــا عقيمه = ياقف على ثنتين والناس دارين
( قوس الربابة )
انشدك عن واحـــد ٍ ذبـــــاح = عند العـــرب دايم غالي
يذبح خويه من دون سلاح = وفي النفس فنه ما زالي
( النوم )
ياجماعه جبت انا اللغز من خمسة حروف = ومن ورد بالحل وعجل ذا شخص فهيم
وش بنت من قشرها غمضه ماتشوف = لو تشوف شوي تجمح وصار اللي يصير
( القنبلة )
انا انشد وانشد عن ذهيبه خفية اذكاره = وهو إلى جاء مسيّرجاب خيره وشره يمشي به
ولاله ديرتة ٍ تعرف ويقضي الوقت بسفاره = وناس ماتبي شوفه وناس إلى جاء تهلي به
( الجراد )
ياويش رجل ٍ حط في بطنه بنات = وكفن وطب القبر والعــــالم تشوف
الرجل حازم والبنات محكمات = والجنس مثل الجنس والرجل معروف
وانه مخلـّـد لا حياة ولاممـات = ولابد يبعـــث ويبعـــث معـــــــه خوف
( الرصاص والسعف والرشاش )
انا بنشدك عن بنت مسكنها وسط بنت = وعذاب من هي ساكنه في حشاها
تمشي في بطن امها والمشي بصمت = وعذاب لأمها وتقطعهــــا من نماها
( سوسة النخلة )
انشدك عن ذودين صفرا ومجاهيم = وفيهن قعيدتهن وفيهن فحلهن
يسوقهن ربع ٍ على الــورد شفقين = واللي يوردهن لعــــده كسبهن
( حبوب الكيرم ) هذة الاجابة يا اخ ديرم
انشدك عن عذرى تزوجها غشيم = وعند اهل العلم جيزتها حرام
بناتها عشرين يلقـــــــاها الفهيم = واذا اخذها الرجل راحت عدام
( بكت الدخان )
انشدك عن ورع حكم له خلق = حكمه في للحظه صدر فيهم
ناس في حكمه حــرقهم حـرق = وناس تعلـّــت مراقيـــــــهم
( الهدف الذهبي )
انشدك عن بنت فيها الخير والشر = موجوده منذا العصور القديمه
تضرب بها الامثال وبالطيب تذكر = وآخر حياة البنت صارت عديمه
( النار )
انشدك عن رجل ٍ يعلق بساقيه = وراسه على وجـــــــــــه الخطر مايخافي
وفيه النِفس وجمـــــاد باقيه = مسكين جلده مايضفي على جسمه الضافي
( منفاخ النار )
انشدك عن عذرى تخيف ولا تخافي = عند بعض الناس دايم ماتغيب
وان سئلها والي يبي كشف الخوافي = تفضحه ولو كان امره عجيب
( البصمة )
انشدك عن رجل ٍ سريع اذا جاك = رجل ٍ لمنك دعيته يجيلك
يفهم هدفك ثم يعرف نواياك = يقبض عليك ثم يخلي سبيلك
( المصعد الكهربائي )
انشدك عن رجال يمشي قدام وورى = مستمر في التقدم و رجوع
مايخــــــــاف لو يقـــــــابل عنترى = خلقه الله لا عيون ولاسموع
( المنشار )
انشدك عن رجل ٍ ركب خامس الخمس = بطنه كبير ولايذوق الطعـــــــامي
ماسئل عن ظـــل ولا سئل عن شمس = وان طب في بحر الهيام مايهامي
( الخاتم )
انشدك عن عذرى لها مستوى زين = عشاقها واجـــد وبكل النواحي
من شانها العالم يروحون قسمين = وكل ٍ يطنب فوقهــــا بالصياحي
بنت اليا طبت بوسـط الميادين = من حرصهم صكوا فوقها بسلاحي
( الكورة )
ياويش بنت زوجوها رجــــــّـــال = اسود سواده كالح كنه القار
صارت بجنبه وعقبهم زانة الحال = واللي جمع بينهم صالي النار
( رقعه تيوب الكفر )
سرحت مع راعي المجاهيم ووفيت = وسرحت مع راعي المغاتير واوفي
وان ردني راعي المجـــاهيم رديت = ماني على الدنيـــــا كثير الحسوفي
( الشيب والشباب )
انشدك عن بنت لشيوخ مسماه = تنقل ولدها دايم في ظهرها
وان مــات ولدهـــــا ماتت وياه = وان مــاتت يلقى هو بدلها
( بطاقة الأحوال )
انشد العراف عن رجلا قديم = ماذهـــــب مع جيل راحـــوا واخسروه
بين فعله لو ان جسمه سقيم = سيرته من قابضينه مافعل لو اتركوه
( القلم )
انشد العراف عن علم وكيد = وش حاجته تضحك وتخفي شرها
نوب تجيب الخير لونه بعيد = ونوب يلوف الكبد والله حــــرها
( الدنيا )
انشدك عن رجل ٍ على الظيم صبار = رجــل ٍ مريض وعلته داخليه
بسباب ورع شب في جوفه النار = والورع يحمل كل شخص سميه
( قلب السخانه )
انشدك عن حـــي في البـــــحـــر مي = يشرب ولاياكل وهو في محيطه
نابت من الماء في البحر مصدره مي = عجزت احدد موقعه في الخريطه
( الجنين )
انشدك عن بنت كثيرة الجمــــالي = تمــــــر عريـــانه ولاهمهــــا الناس
اليا اضحكت تبهر عقول الرجالي = والى بكت تزيل عن النفس الاتعاس
( السحابة )
انشدك عن شي يجي في الدقيقه مرتين = وكل السنه مامر ولكن في القرن اذكروه
تراه واحد ماذكرنا لاتحسبنه اثنين = من عرض عشرين وثمان اهل المعرفه طلعوه
( حرف القاف )
انشدك عن بنت مع النـــــاس = معلقه اعيالهــــا في ارقبتها
اعيالها يجون اشكال واجناس = ولولا اعيالها اناس مابغتها
( ميدالية المفاتيح )
اسألك عن بنت بها الناس يشقون = ومهما يطول بها العمل ماتمله
اعيالها من عند فمهــــــــا يطيحون = اليا طاح هذا صـــار هذا محله
( الدباسة )
بنشدك عن عذراعن خواته تختلف = واقفات قاعدات وهي وحده وقوف
وقفها دايم يجي عقب التــــلــــــف = يوم نطريهـــا يقــع بالقلب خـــوف
( صلاة الجنازة )
انشدك عن عوداً مايجيه النوم = الناس ترقد والعود سهرانى
العود ضيفانه على دايم الدوم = وماقيل يوماً ضيف العود رجالى
( برج المراقبة و المطار )
بنشدك عن ضيف بدار المعــازيب = الضيف يكرهم وهم يكرهونه
وليل قلط يقلـط على غير ترحــيب = ضيف من الزلات مايامنونه
يحتاج له في بعض الاوقات تأديب = وليا بغى المرواح مايتركونه
( السجين )